筲箕灣：平台僭建物六年仍未拆

「點解個平台多咗間鐵皮屋，咁多年嚟都唔使拆？唔通屋宇署真係咁缺人，連大街大巷都冇人去做嘢？」筲箕灣居民陳先生發現，東大街有大廈平台僭建鐵皮屋，屹立多年仍未見處理，「僭建點都會影響樓宇結構，如果有一日出咗人命意外，由邊個負責？」

屋宇署發言人承認，涉事僭建物早有紀錄，於○八年發出清拆令及警告通知，因有部分僭建物仍未清拆，已檢控有關業主。發言人補充，自一一年擴大須優先取締僭建物涵蓋範圍，去年已向其餘涉事業主發出清拆令，惟未有遵守，已就此發警告信。

陳先生指涉事僭建物現仍未清拆，要求屋宇署檢討執法程序，「我明白可能涉及到業權問題，處理需要時間，但係都冇理由六年都未完成執法。就係因為屋宇署做嘢咁慢，啲業主先會有恃無恐！」陳要求當局做好本分，以免途人生命受到威脅。