未入正題前，先問大家一個問題：市區重建局究竟係乜嘢機構？如果你答係公營機構，理論上係冇錯嘅，但如果你答係發展商，就更加貼切嘞。唔係咩，市建局一味見錢開眼，有錢賺嘅項目大搵特搵，冇錢賺嘅項目就關人個關，完全唔講社會責任，同唯利是圖嘅市儈商人有乜分別！
嗱，「市儈局」又嚟諗縮數嘞。話說，當局一一年推出「需求主導」計劃，原意畀舊樓居民一個選擇，可以主動要求市建局啟動重建項目，至今已經開展咗九個項目，不過市建局早前成立專責委員會檢視計劃，話相關重建項目出現虧蝕，所以打算日後提高申請門檻喎，咁即係想打退堂鼓啫。
市建局個算盤點打嘅呢？佢哋話喎，初步研究不再以同區七年樓齡樓價作為賠償標準，可能改以十年甚至市價賠償，換言之，以後舊樓業主獲得嘅賠償會減少，主動要求重建嘅誘因亦會隨之下降，市建局咪可以金蟬脫殼，推卸舊區重建嘅責任囉。不過功夫茶提醒市建局，你哋嘅銅臭作風似足發展商，不過真實身份唔係發展商，舊區重建嘅目的係改善社區環境，唔係畀你哋賺錢，如果有利可圖就做，無利可圖就唔做，咁仲要你哋嚟做乜吖！
冇錯，市區重建涉及公帑，需要講求成本效益，但係都要分清主次。本港舊樓林立，而且數量不斷增加，現時樓齡五十年以上嘅舊樓增至六千幢，比一○年嘅四千幢增加咗一半，當中唔少已經溶溶爛爛，搖搖欲墜，如果市建局唔去重建，發展商亦唔去重建，邊個去重建呢？萬一馬頭圍道塌樓慘劇重演，邊個又承擔得起呢？正所謂，人命關天，舊區重建關乎公眾安全，絕對唔應該一味金錢掛帥，新計劃實施三年就開倒車，由「需求主導」變成「毛利主導」，呢個就係市建局唯利是圖、罔顧責任嘅有力註腳。
講到尾，舊區重建任重道遠，單靠一個縮骨卸膊嘅市建局，既所託非人，亦不切實際。咁多年嚟，舊區重建缺乏全盤規劃，一味零敲碎打，東補一幢牙籤樓，西補一幢蚊型樓，唔止無助解決房屋問題，反而影響市容，浪費土地資源。好似舊區土瓜灣咁，擁有地利之便，又有地鐵沙中線貫穿而過，重建本來大有可為，可惜當局只識修修補補，零零碎碎，根本無濟於事。
一句講晒，本港舊區重建成效不彰，慢過龜爬，怨聲載道，問題正正就係出於市儈局同特衰政府。計功夫茶話齋，市區重建政策最迫切需要檢討嘅，唔係需求主導計劃，而係狹隘嘅政策思維，如果講求經濟效益咯喎，咪拆咗市建局囉，應該可以慳番唔少納稅人米飯o架！