我哋早前寫過，外號「金金大師」嘅北區水貨客關注組召集人梁金成，原來係激進泛民政團新民主同盟嘅成員，令人質疑佢搞埋咁多「驅蝗」行動，目的都係想參選。不過，近日有消息話佢已退出新同盟，並密謀成立一個名為「本土公民」組織。莫非佢同新同盟有路線或人事分歧，要另起爐灶參選？
金金大師向我哋證實，已經喺一、兩個月前退出新同盟，佢否認雙方出現分歧，但又講唔出到底因乜事要分手。至於佢同其他本土派成員搞緊嘅「本土公民」，佢就話唔係一個新組織，而係一個新社交網頁嘅名稱，皆因佢過往啲社交網站帳戶畀人攻擊得太多，所以要另搞一個網頁喎。問及佢係咪有意參選，佢淨係答話希望會有真正代表本土意識嘅人士參選，現階段佢會集中精力做好相關嘅推廣工作喎。
有新同盟中人指出，新同盟有個別成員本身係新移民，所屬選區亦有唔少新移民票，因此對范國威與金金大師大搞「驅蝗」有微言。至於范國威另一個專搞「反蝗」嘅組織「香港本土」，成員包括其他泛民政黨嘅黨員，唔方便打正旗號用嚟搞選舉，估計呢個先係金金大師退黨及另立門戶嘅原因。