政情：橄欖評分急挫 緊貼AV仁
香港研究協會尋日發表最新嘅立法會議員表現評分調查，三十五名地區直選議員當中，有廿四人評分下跌，得十一個上升，當中以民建聯陳鑑林（橄欖）跌得最急，急跌○點三九分至二點三七分，喺九龍東選區五位議員之中排名最尾，唔使講都知係同佢擔任籌委會召集人嘅香港龍獅節，畀審計署揭發涉嫌「篤數」有關喇！
五名超級區議員方面，喺上次調查已經評分急跌嘅民主黨前主席何俊仁（AV仁），原來民望仲未見底，喺今次調查再跌○點○七分至二點三五分，即係仲差過橄欖，當然又係佢早前畀記者影到，喺立法會公然睇艷照有關。
另民記三子評分低過「仁」
正所謂低處未算低，調查顯示原來竟然仲有四名議員評分低過AV仁，包括三名民建聯議員陳克勤、鍾樹根同陳恒鑌，以及同屬建制派嘅梁美芬。至於同樣牽涉盛事基金醜聞嘅商界議員林健鋒，由於今次調查並唔包括功能界別議員，所以唔知道佢嘅民望跌咗幾多。