立法會足球隊將於本周六大戰醫院管理局，早前踢波整親腳嘅「長毛」梁國雄，據聞將會久休復出，落場比賽。有建制派議員就笑言，長毛喺立法會發動拉布引發政府財政危機，導致醫管局率先被政府「斷糧」，被迫動用儲備應付日常開支，無喇喇蝕咗成一百萬元利息收入，唔知到時班醫管局高層會否下令，叫班醫生同職員故意針對長毛踢狼啲，藉此出番啖氣呢？
不過，其實長毛早前養傷期間，都有坐住輪椅開會，就算佢今次又去整傷腳，改為坐住喺度嚟拉布，可能比企喺度仲輕鬆添！再者呢場立法會對醫管局大戰，本身經已係一波三折，先後因不同原因而被迫改期，最後鐵定於本周六舉行。但如果拉布情況進一步惡化，立法會主席下令星期六都要開埋會，呢場波隨時又會踢唔成，有人想「治理」長毛都冇機會。