香港公務員薪高糧準，被視為金飯碗，令打工仔趨之若鶩。咁又難怪嘅，先天下之樂而樂，後天下之憂而憂吖嘛，除咗亞洲金融風暴及沙士襲港經濟最差嗰幾年，公務員基本上年年加薪，永無甩拖。呢嗱，今年又夠鐘加人工啦，而且仲跑贏通脹添！
薪酬趨勢調查報告日前揭盅，未扣除每年遞增嘅增薪點前，高級公務員加薪指標達到百分之六點九一，中級亦有百分之五點六一，低級則為百分之五點三二；而扣除增薪點後，加薪幅度分別為，高級百分之五點九六、中級百分之四點七一、低級百分之三點八。有人計過數，屬於低級公務員嘅技工每個月可以加六百蚊左右；屬於中級公務員嘅二級行政主任每月加薪逾千；至於高級公務員例如常任秘書長咯喎，每個月加薪超過一萬蚊，係名副其實嘅高者愈高，低者愈低。
唔知大家認為呢個加幅合唔合理，基層公務員就似乎唔係幾滿意嘞。有立法會議員話，舊年政府淨係根據指標釐定薪酬加幅，令唔少公務員有意見，有紀律部隊因而退出薪酬趨勢調查委員會，希望政府今年謹慎決定。亦有工會代表希望當局充分考慮包括員工士氣、經濟情況、通脹同工會要求等，希望低層公務員加薪幅度可以同中層睇齊。而紀律部隊評議會更要求最少加薪百分之五點一添。其實按照慣例，低級公務員加幅多數會同中級睇齊，高過舊年通脹同今年通脹預測。
即係咁，人同此心，心同此理，打工仔梗係希望加薪幅度愈高愈好，呢點係無可厚非嘅，之但係肥上瘦下就係另一回事嘞。高官嘅待遇本來已經優勝過低級及中級公務員好多，加上加薪幅度次次都高一大橛，距離愈拉愈遠，佢哋就話睇法國電影飲咖啡優哉游哉啫，難為基層捱到金睛火眼，唔谷氣就有鬼咯。講到底，香港貧富懸殊愈演愈烈，深層次矛盾不斷惡化，政府帶頭搞分化，絕對難辭其咎。
當然喇，如果高官物有所值，納稅人並唔介意支付高薪，可惜事實啱啱相反，港產官僚高薪厚祿，但就食嘢唔做嘢，做嘢打爛嘢，搞到施政失誤連連，烏龍百出。淨係高鐵醜聞咋，工程延誤成本超支唔在講，官員仲被踢爆同港鐵夾口供呃市民，依家係威係勢成立專家小組調查，竟然事先聲明只查不足不究責任，你話係咪離譜吖？
話時話，香港高官人工一流，求其一位局長嘅收入都多過美國總統，弊在施政能力九流，咁算唔算收入同能力不相稱呢？睇嚟薪酬趨勢調查委員會唔應該淨係調查加薪幅度，亦應該調查納稅人對公務員嘅「滿意度」，咁先至公平吖嘛！