政情：劉燕卿樂做「和事老」
申訴專員劉燕卿（Connie）上任近兩個月，尋日出席活動時容光煥發，睇嚟適應得唔錯。Connie笑笑口話，新工一啲都唔辛苦，不但唔會成為市民同政府部門之間嘅磨心，仲好樂意做大家嘅「和事老」喎！
盼盡量用調解處理個案
Connie話，上任後發現唔少個案只係雙方溝通出現誤會，未必係涉及人為疏忽，所以盡可能希望以調解方式處理。結果申訴人可更快得知調查結果，擺番個公道，雙方都開心。
出席同一場合嘅懲教署署長單日堅一見到Connie就雞啄唔斷，莫非單sir都有不滿要向Connie「反申訴」？單sir笑言，只係邀請Connie多啲派員到懲教署轄下署所，以便一旦需要處理有關懲教署嘅申訴時熟手啲。不過Connie就話，佢早已以太平紳士身份巡視監獄幾次，懲教署亦唔係被投訴嘅重災區，單sir大可放心啦！