政情：今日你上鏡：阿茂教人慳水變嘥水

水務署尋日搞咗個「齊來慳水十公升」運動啟動禮，仲搵埋發展局局長陳茂波（波波）化身「水喉佬」。波波除咗教人點樣每日慳水十公升之外，仲即場揸住個士巴拿，示範點樣喺水龍頭加裝節流器。點知佢雞手鴨腳搞完一輪，終於將個節流器裝咗上去，但係一打開水喉，啲水就漏晒出嚟，嚇到主持人即時幫手閂水喉。波波教人慳水變嘥水，認真教壞細路。不過，大家都知道波波係會計師出身，計數就話難佢唔到啫，搵佢做發展局已經成日甩轆，依家仲要佢落手落腳做呢啲小型工程，咪盞出醜！