今年係六四事件廿五周年，支聯會主席李卓人按慣例申請喺立法會提出平反六四嘅動議，但受到激進泛民發動嘅預算案拉布戰影響，令立法會大會議程大擠塞，預計今年嘅六四動議，九成九都唔可以趕及喺六四前進行，可能被迫好似去年咁，改於立法會大樓外嘅添馬公園進行非正式辯論。不過，支聯會將於今個月底，喺城大舉行一個六四國際研討會，不但係六四發生廿五年來首次，據聞仲有唔少猛人參加，某程度算係一次補償。
國際研討會分兩日舉行，首日主題包括「中國民主何去何從」、「六四事件與香港發展公民社會」，第二日就有「中國公民社會發展」、「工人運動與公民社會」等。除咗本地學者同政黨代表外，仲請到「零八憲章」發起人之一嘅維權律師滕彪、美國漢學家林培瑞、研究中國近代政治嘅巴黎政治學院學者Jean-Philippe Beja等。之前多次闖關都入唔到境嘅八九民運領袖王丹同楊建利，亦會透過視像發言。至於今年會唔會再有民運人士嘗試闖關嚟香港參加六四晚會，消息人士就話梗係有喇，但係就唔會事先張揚囉！