政情：人力 社民連出位靠女神
本港兩大激進泛民政團人民力量同社民連，雖然本是同根生，但其實無論喺選舉、社運、以至議會政治上，都係競爭對手，其中一方搞示威或拉布，另一方好快就會照跟。自稱唔鍾意公開私生活嘅人力主席袁彌明（Erica），早前高調喺網上公開同另一人力核心林雨陽嘅戀情同婚訊後，社民連副主席吳文遠嘅女友「民主小女神」周澄，近日亦不約而同喺社交網站大晒兩人嘅戀情同拍拖相，莫非兩黨為咗博出位同爭曝光，連公開黨內核心成員嘅戀情都要鬥一番？
袁高調宣布婚訊
自從Erica宣布婚訊後，連日成為傳媒關注嘅對象，再加埋佢早前專登飛去台北，要求財團暫緩將海怡西商場改成特賣場，令佢曝光率即時大增，亦成功吸納一批新支持者。
至於二○一○年曾經以「大專2012」名義參選「五區公投」嘅周澄，雖然最終落敗，但佢特立獨行及清麗靚樣已令佢名噪一時。近年周澄刻意淡出社運界，周不時去吓旅行，又為唔同機構撰寫國際關係文章，日子過得好寫意。不過幾個月前佢又重投政治行列，出任某泛民立法會議員研究助理，負責處理環保同文化政策等議題。
近排周澄突然經常喺男友吳文遠嘅社交網站出現，不時上載佢同吳文遠出街食飯撐枱腳、煲愛心湯畀對方飲嘅相，大晒幸福，同兩人之前將戀情收收埋埋嘅態度比較，出現咗一百八十度轉變。
周頻上載甜蜜照
周澄高調大晒戀情，同Erica宣布婚訊嘅時間不謀而合，唔知係咪因為聽到Erica嘅婚訊，心思思想向另一半施壓呢？
我哋問過吳文遠，佢就話唔少好友都知道兩人拍拖，近來將戀情公開化並無其他考慮。佢又話，暫時以事業為重，所以未得閒思考人生大事，或者等周澄攻讀埋碩士之後，就會考慮迎娶對方喇！講講吓，佢又透露選舉臨近，自己可能參選，所以冇諗成家立室之事。咦？咁佢打算參選乜嘢？佢就扮神秘，唔肯多講喇！