政情：中環出更：施俊輝與「葉太」不解之緣

教育局政治助理施俊輝（Jeff）去年底「封盤」娶老婆，唔再做鑽石王老五，原來Jeff除咗情訂施太，同「葉太」都相當有緣。不過，今次講嘅唔係當年提攜佢嘅新民黨主席葉劉淑儀，而係教育局前副秘書長葉曾翠卿（Betty）。原來兩人早喺十年前已經有一面之緣，只係估唔到仲可以做埋同事。

Betty啱啱展開退休前休假，令Jeff好感觸。Jeff日前喺社交網站不但上載咗同Betty餞行嘅合照，仲有張係年輕版Jeff同葉太嘅合照，話說○四年Jeff獲選油尖旺區傑出學生，時任教育局首席助理秘書長嘅Betty頒獎畀佢，對照兩人當年今日嘅模樣，除咗Jeff成熟咗啲之外，兩人似乎冇乜點變過。

Jeff笑言一直都唔知道呢段緣分，直至去年為籌備婚宴搵番舊照時，先驚覺當年頒獎畀佢嘅官員好似每日坐喺佢隔籬房嘅Betty，於是即刻搵Betty相認。Betty都唔記得當年頒過獎畀Jeff。所以話，緣分天注定。

卓妮