政情：中環出更：亂局未息港商聞越色變
沙田馬場尋日有賽事，唔少商界名人不約而同講起近日越南反華暴亂。廣東社團總會主席王國強（KK）上個月啱啱去過河內，佢勁呻估唔到今時今日仲有咁污糟嘅地方，仲話以後都唔會再去喎！香港工業總會名譽會長孫啟烈（Cliff）就話，雖然自己冇喺當地設廠，但係有唔少業界好友嘅廠房遭受衝擊，大家都緊急調回派駐越南嘅港人，事關人命最緊要。
KK話，上個月佢去到越南首都河內，當地環境差，又污糟，連一條乾淨少少嘅街道都冇，佢惟有一直坐喺車上，唔敢落地。
王國強怨衞生從無改善
KK講到七情上面，話估唔到越南今時今日仲係咁落後喎！轉頭卓妮見到做過工總主席嘅Cliff，佢無奈話，講到底，今次騷亂係同當地政治有關，港商避無可避。
講講吓，一位稀客喺卓妮身邊行過，佢就係憑著名烹飪節目而揚名海外嘅甄文達（Martin）。Martin啱啱落機就趕住入場，當佢見到Cliff，即刻好熟絡打招呼，原來兩人相識三十幾年，早排Cliff去美加遊玩時，仲去過Martin間餐館食飯，尋日兩人喺馬場偶遇，認真有緣分。
新界社團聯會理事長陳勇（Brave）亦有入場，佢話鍾意買六合彩多過買馬，咁多年嚟，幾乎期期六合彩都冇錯過。咪以為佢咁得閒每一期都走去落注，其實係揀定冧巴後，一買就三十期，唔使煩。買六合彩無非係想發達，Brave都話成日會諗中獎後會做啲乜，雖然多年嚟只中過一次獎，彩金幾千元，但係輸咗都係做善事，一樣咁開心。
卓妮