國際護士節剛過，功夫茶喺度向全港「白衣天使」鞠躬致謝：辛苦晒！多謝晒！
講到辛苦，公立醫院護士深有體會，前線同事不斷流失，人手短缺愈演愈烈，日日喺「十個煲七個蓋」情況下工作疲於奔命，壓力山大隨時爆煲。弊在屋漏偏逢連夜雨，「白衣天使」退休潮又殺到，睇怕都有排捱咯。
隨着戰後嬰兒潮出世嘅護士陸續退休，二○一八年打後係護士退休高峰期，根據醫管局嘅推算，退休人數將會由本年度嘅一百六十一人，逐年上升到一八至一九年度嘅三百二十人，足足翻咗一番，問你驚未！數字仲顯示，由本年度到二○二一至二○二二年度，醫管局累積有超過二千三百名護士退休，其中以九龍西聯網最多，有接近三百人，其次係九龍中同港島西。各專科中以內科最多人退休，其次係精神科同外科。更得人驚嘅係，一八年起退休人數達到以往嘅一倍，計埋提早退休嘅，人數只會更多，問題只會更嚴重。
護士退休潮在即，咁當局有乜嘢對策先？答案係，乜都唔使做。醫管局總護理行政經理廖慧嫺滋油淡定咁話，近年大專院校、公私營醫院護理課程增多，每年會有約二千名新畢業護士投入市場，有助應付退休潮喎。
乜話？啱啱走出校門嘅新手，可以一對一替到資深嘅老手？咪玩啦。立法會衞生服務界議員李國麟講得啱嘞，資深護士不足，新人難以填補流失嘅經驗，臨床監督自然唔足夠。佢仲警告，家陣已經出現每更冇護士長級別嘅資深同事睇檔，退休潮勢必令問題雪上加霜。
議員唔係杞人憂天o架。醫管局淨係計有幾多新人補充，唔提新手生產力，擺明玩數字遊戲啫。嗱，前排有調查發現，公立醫院醫護人員工傷個案近年維持每年三千宗以上，比建造業工業意外數字仲多，平均十一名員工就有一人受傷。點解會咁？人手短缺吖嘛，家陣一名護士最多一日要照顧三十名病人，遠超國際標準近五倍，仲要兼顧其他工作，唔出意外至奇。醫護人員忙救人之餘仲要忙自救，你話服務質素點可能提高吖！
話時話，醫管局每年經費唔少o架，如果用得其所，何至於搞到依家咁烏煙瘴氣，醫療醜聞無日無之吖。弊在局方管理混亂，資源錯配，真正投放於前線嘅資源嚴重不足，咪卒之搞到七國咁亂囉。
治病救人唔係做數學題，公立醫院護士買少見少，病人愈來愈多，服務質素只會愈來愈差嘅咋。官老爺咪自欺欺人嘞，前線人手缺口不斷擴大，必須未雨綢繆對症下藥，再唔度橋諗計，公營醫療隨時玩完，受害嘅咪又係普羅市民！