審計署早前揭發獲盛事基金資助嘅「盛事」大多都成效不彰，當中如龍獅節等部分項目，更出現帳目混亂同涉嫌利益輸送等問題。原來早喺二○一○年廉政公署防貪委員會與政府合作檢討基金運作時，已有委員提議摺埋整個基金，但當時由「貪曾」前特首曾蔭權爵士領導嘅特區政府，就對廉署嘅忠告置若罔聞，仲反過來向立法會申請多一億五千萬元撥款，注資入盛事基金用多幾年，最終搞出個大頭佛。話說回來，其實貪曾一向都當廉署冇到喇，如果唔係又點敢「貪盡海陸空」呢？
