政情：人力公文袋 赴台摸門釘
有傳海怡西商場將會變為特賣場，多個政黨都排隊飛去台灣同商場大業主反映當區居民反對意見。不過除咗當區區議員、新民黨陳家珮同民主黨南區區議員區諾軒，可以同該公司總裁會面外，人民力量同公民黨近日派人飛去台灣都摸門釘，相比之下就比較蝕章嘞。
袁彌明聲稱與「負責人」對話
海怡西商場大業主最近分別派出公司總裁同陳家珮同區諾軒會面，陳區二人事後仲將總裁卡片公開，力證係同最高層人士反映海怡西居民意見，人民力量主席袁彌明（Erica）同公民黨成員葉穗倫打算照辦煮碗，並盼望獲得該公司同等待遇。不過呢個只係佢哋一廂情願，因為我哋聽聞該公司總裁最近不在台灣。
事有巧合，Erica喺社交網站留言話，自己成功同負責人直接對話，同場遞交一千五百份問卷同簽名，然而佢未有透露負責人係咪等於該公司總裁，唔知係咪內含玄機呢？至於最遲先飛去台北嘅葉穗倫喺「執四攤」情況下，只獲該公司派出副總經理同佢會面，唔知道見到呢個最新情況，其他有心赴台嘅政黨會否「停一停，諗一諗」呢？