多次揭發「貪曾」政府種種浪費公帑行為嘅「107動力」召集人何民傑，依家睇落大大隻隻，但原來佢讀書時經常畀人欺凌。尋日佢出席立法會經濟發展事務委員會聽證會，就香港發電燃料組合諮詢表達意見時，突然自爆當年讀男校，成日畀班大隻師兄恰，每次去親球場踢波硬係畀人請食波餅，搞到周身瘀。不過佢後來諗到奇招，就係慳埋慳埋啲零用錢用嚟買三級錄影帶，然後請晒班大隻師兄一齊睇，最後雙方即刻friend晒，冇再受欺凌。
到底呢段悲慘嘅童年經歷，同香港未來用乜嘢嚟發電有乜關係呢？何民傑話可以用嚟比喻香港向內地買電喎，擔心香港一開始咗向內地買電，就會好似依家向內地買東江水咁，即使香港最後用唔晒，都要畀人住搶收取昂貴嘅水費同電費。佢個人唔反對香港向外買電或買入發電燃料，但前提係要經過全球採購，避免自己變成被欺凌嘅對象。呢個比喻真係同佢當年嘅經歷一樣咁騎呢。