政情：政府抗拉布玩鬥大
立法會大會嘅拉布戰已經開打咗兩個星期，近日更蔓延至財務委員會同工務小組，以「長毛」梁國雄為首嘅激進泛民，分別針對財政預算案、新界東北前期撥款、以及「三堆一爐」工程撥款，三線一同拉布，令政府運作瀕臨癱瘓。據聞政府已決定向長毛等人「鬥大」，喺未來幾日派出各名司局長，逐一向市民說明拉布戰嘅實際影響，包括瑪麗醫院重建可能被迫押後、多項關愛基金試驗項目冇得變成恒常撥款等。政府內部更有人建議財政司司長曾俊華（鬍鬚曾）「玩鋪勁」，由得政府財政跌落懸崖，令香港好似美國咁出現政府部門關門大吉、各項公眾服務同資助津貼停頓、全港十多萬公務員同紀律部隊人員冇糧出等，藉此迫長毛等人投降，停止拉布。
高官將排隊告急
鬍鬚曾同長毛最近多次公開駁火，首先有長毛喺會議廳內當面向鬍鬚曾掟陰司紙，鬍鬚曾隨即反擊叫長毛「行開啦」。之後鬍鬚曾仲寫網誌揚言自己讀書時喺美國見慣場面，隨時爆粗回敬對方。喺剛過去周日，鬍鬚曾再次出招，指拉布至今已令醫管局喪失約一百萬元利息收入，呼籲拉布議員「回頭是岸」。
消息指出，港府高層今日會接力於行政會議舉行前，高調向公眾傳達「拉布癱瘓，全線告急」嘅訊息，隨後再有多個問責局長排隊開腔，向市民說明拉布對社會嘅實際影響。
以負責審批政府撥款嘅財委會為例，目前議程已經出現「大塞車」，當中包括施政報告提出將小學生在校免費午膳津貼恒常化嘅建議、將「學校書簿津貼計劃」嘅津貼額提高、仲有惠及超過廿萬在職貧窮家庭嘅「低收入在職家庭津貼」前期撥款等，通通都受到拉布影響而要押後推行。負責審批工程撥款嘅工務小組方面，財政事務及庫務局局長陳家強尋日亦去信小組，要求喺本月底加開多場會議，以便處理眾多積壓多時嘅議程，希望令外界明白拉布嘅後遺症。
鬍鬚曾召眾商討
鬍鬚曾到本周四會再舉行內部緊急會議，召集各個政策局代表商討臨時撥款一旦耗盡嘅應變方案，據悉當局將優先支付畀外判工人同供應商嘅開支，相反被視為「鐵飯碗」嘅公務員人工，就會押至最後才支付，變相借全港公務員同紀律部隊向拉布議員施壓。政府內部有人更提出，長毛等人根本係「唔見棺材唔流眼淚」，向鬍鬚曾建議任由政府財政喺跌落懸崖，但講到底呢招係「七傷拳」，極可能傷人又傷己，唔知鬍鬚曾敢唔敢玩到咁大呢？