政情：中環出更：IT界拍片撐設創科局
港府早前終於重提成立創新及科技局（IT局）嘅政府架構重組建議，但有個別泛民立法會議員揚言會拉布阻撓。一直支持成立IT局嘅互聯網專業協會會長洪為民（Witman），早前就聯同一批IT界兄弟姊妹夾錢同度橋，諗住自編自導自演拍番部微電影撐設IT局，並揀喺極具象徵意義嘅科學園取景。點知當日天不作美，落起傾盆大雨，最後被迫移師室內拍攝，效果多少打咗個折扣。IT界拍微電影撐IT局都出師不利，莫非預示呢場架構重組拉布戰避無可避？
雖然被迫改於室內取景，但呢套微電影嘅台前幕後班底就絕對唔輸蝕，除咗搞手Witman粉墨登場飾演其中一個角色，套戲嘅監製同編劇，分別為兩名IT女將李煥明同黃麗芳，再由IT公司老闆蘇耀經負責執導。其他演員仲有叙福樓集團執董黃傑龍飾演酒樓侍應、青年創業家聯盟會長陳龍盛等。
拍外景落雨 移師室內
首日開拍，當然有按照傳統切燒豬，點知都係天不造美，整日大雨滂沱，拍攝隊惟有暫時取消外景拍攝，轉去拍室內戲。
部微電影嘅內容取材自真人真事，講述一位IT人賣樓兼押上「老婆本」創業，但遭到女友反對，後來又遇上來自外星嘅「都教授」指點打救，似足啲韓劇咁傳奇。據聞Witman仲一度斟過外貌同韓劇角色「都敏俊」有八成相似嘅莊士集團太子爺莊家彬飾演「都教授」，可惜對方怕醜婉拒喎。到底最後呢位IT男嘅命運係點？黃麗芳就大賣關子，話結局原來有兩個版本，是悲是喜，由觀眾投票決定。
呢套微電影預計將於月底面世，首先會放上網上媒體播放。拍得咁辛苦，都係為咗喚起社會關注香港IT業界發展，Witman慨嘆本港IT界不乏猛人，可惜「有種子，欠土壤」，希望政府帶頭推動吓。
卓妮