自從台灣發生佔領立法院嘅學運之後，唔少人關注立法會會否面對類似情況。立法會行政管理委員會尋日召開閉門會議，審視及商討有關應變措施。結論係唔使怕，若有需要立法會隨時可以下逐客令，限制向公眾人士開放。一旦真係被「佔領」，原來班議員隨時可以去第二度開會，連境外都得喎！
行管會主席曾鈺成話，相信喺正常情況下，現有保安措施已經足夠。一旦有特殊情況，尋日會議就決定授權秘書長喺徵詢行管會意見後，可以限制向公眾人士開放。咁若果真係被佔領點算？曾鈺成就話，一旦會議廳無法使用，法律上係可以搵任何合適地點開會，唔會影響立法嘅法律效力。
咁又係，當年臨時立法會都係喺深圳開會，只係有人入稟法院質疑臨時立法會是否合憲。其實今個周末成班議員將拉隊去上海，若立法會「淪陷」都可以考慮以上述模式出埠開會，到時大家放鬆晒繃緊嘅神經，就冇咁多拉鋸戰喇！