政情：中大提早同沈祖堯續約3年
香港中文大學校長沈祖堯嘅任期喺明年六月屆滿，中大校董會尋日就宣布一致通過沈祖堯續任，任期三年至二○一八年六月底。沈祖堯年初先講過，對於係咪續任內心都好掙扎，因為除咗做校長，佢都想多啲幫病人睇病。話音甫落，中大就決定同沈祖堯續約，莫非係中大見到香港大學揀新校長都搞到一鑊泡，所以索性速戰速決？
尊重沈意願縮年期
中大校董會主席鄭海泉就話，其實佢哋就續任校長一事收到唔少意見書，亦都開咗十場諮詢會，大家都全力支持沈祖堯續任。至於點解續任年期唔係慣常嘅五年，鄭海泉就解釋，因為沈祖堯希望喺不遠嘅將來可以重新擔任內科及藥物治療學全職講座教授，為咗尊重佢嘅強烈意願，先至續任三年，等佢可以喺大學工作同擔任臨床教研職務嘅意願中取得平衡。
沈祖堯就話，會竭盡所能服務中大，唔會辜負大家對佢嘅信任同期望。話時話，沈祖堯依家先至五十四歲，相信佢再做多三年校長，之後繼續從醫或執教鞭都仲有心有力嘅。