政改能否通過仍然言之尚早，但近月政圈已傳出唔少各陣營對二○一六年立法會選舉嘅部署，包括上屆選舉成功殺出重圍，由功能組別轉戰九龍東直選嘅謝偉俊（Paul），政圈一直有傳佢有意染指超級議席，所以未來會先進軍區議會選舉。但據知情人士透露，阿Paul無意問鼎超級議席，除非被人逼走，否則都會留喺九龍東繼續作戰。
阿Paul上屆選舉獲有勢力人士力捧，多名建制派地區樁腳突然發功為佢拉票，最終成功送佢入局。最近有消息傳出阿Paul有意轉戰超級議席，原來都係項莊舞劍，意在沛公，呢啲消息唔多唔少同九龍東嘅勢力分布有關。
若阿Paul真係問鼎超級議席或轉戰其他選區，最大得益者一定係九龍東嘅建制派，例如觀塘區議會主席陳振彬及副主席蘇麗珍，唔通係有心人想阿Paul離開九龍東？據聞操盤人已就一六年立法會選舉嘅超級議席作出初步協調，真命天子唔係阿Paul，至於係邊個，大家拭目以待喇！