政情：泛民玩拉布 建制寧流會

長毛揚言下年或過萬項

前晚凌晨係議員就預算案提出修訂嘅限期，秘書處尋日初步統計，一共收到一千九百一十七項修訂，大部分來自激進泛民議員。當中單係社民連「長毛」梁國雄一個人，就獨力入咗一千五百零三項修訂，佔咗總數差唔多八成，包括逐個政策局要求削減佢哋啲高層官員嘅人工同酬酢開支。人民力量陳偉業、陳志全、獨立泛民黃毓民及新同盟范國威，亦分別入咗十幾至百幾項修訂。長毛講到明今次拉布係劍指全民退休保障嘅時間表同路線圖，如果政府唔回應，下年隨時會入到過萬項修訂。

之前講過今份預算案唔值得要拉布嘅溫和泛民三大黨，即民主黨、公民黨同工黨，最後亦反口入咗數項至十數項修訂，要求削減不同高官及部門嘅預算開支。當然佢哋自己唔會承認提修訂嘅目的係拉布，但對於政府、建制派同一般市民嚟講，咁做唔係拉布又係乜嘢呢？

剪布不成勢陷財政危機

立法會議事務規則委員會早前提出「剪布四招」諮詢全體議員，但喺泛民拖延阻撓下，遲遲都未達共識，今場拉布戰暫時出唔到招。有建制派議員直言，為咗向有關方面交代，佢哋表面上都會排下期、編下更，作狀輪流留守會議廳迎戰泛民拉布，但私底下其實有唔少建制派都認為，根本就唔應該再陪泛民一齊癲，不如放軟手腳，撐到就撐，撐唔到就由得佢流會算數，相信立法會主席最終都會以「政府有財政危機」為由剪布。

有政府中人警告，根據上次經驗，立會主席只喺拉布持續一段時間後，先至夠膽行使酌情權下令剪布，如立會因建制派缺席而不停流會，泛民根本拉唔到布，主席就缺乏足夠理據剪布，令政府隨時喺五至六月出現財政危機，全體公務員兼問責官員冇糧出。所以，政府今日起將派出大批高官「狗仔隊」，長駐立會各出口監察議員行蹤，以免拉布戰開波冇耐就流會收場。