中環出更：議員愛掟嘢劉兆銘想交流

同鄉星爺邀遊立會

話時話，星爺係金融界代表，點解帶演藝界朋友去玩呢？劉兆銘解畫話，今次呢個鴨仔團團友係鶴山同鄉會一班鄉里，佢係同鄉會會長，而星爺亦係鶴山人，所以佢哋早已相識多年。尋日星爺因為公務繁忙，未有帶隊參觀晒成個立法會，但都一盡地主之誼，陪班同鄉食午飯。

行完一個圈之後，唔知有咩特別感覺呢？劉兆銘好客氣咁話，今次係佢第一次參觀立法會，係抱住做學生嘅心態而來。至於近年立法會部分議員有鋪掟嘢癮，劉兆銘就話，身為演員，佢都好想同呢啲人交流。唔知星爺有冇考慮揀啱激進派議員可能掟嘢嘅日子，再邀請劉兆銘去立會見識吓呢？

卓妮