中環出更：新掌仁愛堂吳明珍獻唱

黎棟國無懼走音

黎棟國為做善事獻出自己嘅第一次，同吳明珍合唱《相思風雨中》，台下一眾賓客諗住洗耳恭聽，殊不知佢唱到走晒音，又甩拍子，後來連播放伴唱音樂嘅音響都停埋添！不過唔緊要，佢哋一於少理繼續唱，氹得全場朋友勁開心。

前主席蕭楚基嘅太太梁詠筠亦唔執輸，捐咗兩幅自己畫嘅國畫幫手籌到十萬元。蕭太話，佢同保安局前局長李少光嘅太太一樣鍾意畫畫，所以李太介紹佢一齊跟名畫家學藝。佢愛畫花草樹木，因人像嘅比例較難捉摸喎！

教育局政治助理施俊輝（Jeff）同太太Karen都有到場。Jeff話，因為工作繁忙，佢哋結婚就嚟半年但仍未有時間去度蜜月，依家計劃暑假補番，不過就唔敢去馬來西亞，尤其係沙巴，事關近期當地適逢多事之秋，惟有捨棄陽光與海灘，可能去歐洲等地玩。

黎棟國（右）同吳明珍（左）獻唱，將晚宴氣氛推向高潮。（溫國佳攝）

副主席曹貴子（中）落力籌款，獲創會主席劉皇發（左）及陳鄭玉而（右）頒發紀念獎盃。

陳鄭玉而輕鬆晒

吳明珍就話，接任後將集中做好教育同醫療工作，包括帶領學生前往極地及亞馬遜等地考察。佢又話，做主席後預咗少啲時間陪屋企人，但係丈夫陳榮濂同囡囡都好體諒。至於落莊嘅陳鄭玉而好開心終於放長假，打算遲啲去上海、越南及加拿大抖個夠。

卓妮