今時今日，保險產品五花八門，令人眼花繚亂，尤其係醫療保險更加多不勝數。可惜，產品多唔等於保障多，好多人以為買咗保險，就可以免除後顧之憂，求個安心，事實係咪咁呢？未必囉！
呢，保險索償投訴局舊年共收到五百三十五宗投訴，較前年上升一成二，喺已經審結嘅三百四十三宗個案中，關於住院及醫療保險嘅投訴佔四成七，多數涉及保單條款嘅詮釋問題，亦有涉及不保項目嘅爭議以及受保人被指冇披露事實。其中只有八宗投訴獲判成立而得到賠償，另外七十一宗個案達成和解，其餘個案唔係被指表證不成立，就係受保人喺各種原因之下撤銷投訴。
點解保險投訴年年上升？咪就係因為保險公司同受保人對保單條款嘅詮釋雞同鴨講囉。其中一宗個案係咁嘅，有位購買危疾醫療保險嘅投保人被確診患上心肌梗塞，以為可以獲得賠償喇，點知保險公司指病人嘅生化報告中，其心肌酵素水平只係輕微高於正常範圍，唔符合保單內嘅定義而拒絕賠償，雙方口同鼻拗，最後要由投訴局一錘定音，病人先至獲賠五十四萬元。亦有投保人患咗急性心臟綜合症，向保險公司申索住院治療費用，但保險公司指投保人未有正確提供開始服用降血壓藥嘅日期而拒賠，卒之又要向投訴局投訴，投保人幾經辛苦至獲得賠償。
話時話，消費陷阱無處不在，類似投訴愈來愈多，大家早就見怪不怪。保險公司拒賠理由無奇不有，佢哋咬文嚼字，玩弄文字遊戲，投保人勢單力薄，又點夠人哋拗吖。最常見嘅係，好多保險產品有附帶條款，寫到密密麻麻，講得好聽係保障雙方利益，講得難聽根本就係陷阱，投保人一個唔留意，隨時貼錢買難受。當然喇，保險公司考慮自己利益係無可厚非嘅，問題主要出喺當局監管不力，加上法律存在漏洞，先至會引起咁多爭拗啫。家陣話就話有個保險索償投訴局維護消費者權益，弊在投訴得直個案一直嚴重偏低，而且費時失事，勞氣勞心，投保人就算好彩獲判賠償，都未必補得番喇！
唔怪得市民咁抗拒自願醫保計劃，港府對保險公司及保險產品監管不力，為咗推卸公共醫療責任，仲企圖推行自願醫保，簡直係本末倒置。咪話功夫茶唔提醒吖，如果當局唔諗辦法加強監管，堵塞漏洞，反而一意孤行搞自願醫保，只會亂上加亂，投訴不斷嘅咋。即係咁，要市民購買醫療保險唔係唔得，港府做好自己份工先喇！