政情：忽然惜食 「松」今拚民望？
距離一七年特首之戰仲有三年時間，如果真係落實普選，有意參選嘅人士就要慢慢開始進行民望工程。好似其中一位盛傳有意參選嘅前財爺梁錦松（阿松），近期動作多多，繼日前以「國際金融專家」身份出席《基本法》研討會爭取曝光後，尋日又忽然環保，出席一個將廚餘製作飯餐嘅中央廚房開幕禮，期間仲講埋教育理念添，莫非佢想為自己當年嘅教育改革爭議洗底？
一反常態 出席環保活動
惜食堂專門回收廚餘，然後製作熱辣辣飯餐，免費派發畀區內有需要人士，佢哋呢個服務都搞咗兩、三年，尋日到第二間中央廚房開幕。其實惜食堂係由「小寶慈善基金」出資，而阿松去年底先出任「小寶慈善基金」嘅名譽主席，所以尋日順理成章出席惜食堂開幕典禮。點解阿松無喇喇投身環保事業呢？佢就話自己向來好着重環保，屋企盡量都唔會煮太多餸菜，以免浪費喎。
不過，阿松打滾政商界咁多年，我哋翻查過佢過往嘅言論，真係唔多覺佢為環保發聲，更加唔好話參與廚餘回收，所以尋日應該係阿松將「第一次」獻畀環保團體。有記者就追問阿松，突然高調搞環保係咪想提高民望，為三年後競選特首鋪路呢？
阿松就話，民望唔係最重要，最緊要係幫到香港市民，雖然呢個答案好得體，但亦令人有無限聯想。阿松講完廚餘即刻「自動波」轉話題，自稱近年成日諗吓點幫香港人，最近就思考緊教育問題。例如佢自己啲小朋友逐漸長大，開始對教育有唔同睇法，唔再好似以前推行教育改革時，一味着重理論，無從實際方面着手喎。
呢幾句說話絕對可圈可點，因為心水清嘅人實記得，阿松未入政府做財政司司長時，已經擔任教育統籌委員會主席，當年負責推行教育改革，最令人深刻一定係佢取消學能測驗，仲批評學能測驗會訓練出「高分低能」學生，惹起教育界反彈。阿松事隔十幾年先至如夢初醒話自己睇法唔同咗，擺明係想幫自己洗底，究竟用意何在，確係路人皆見。