中環出更：新掌專資會 盧偉國帶「向西」團
工程界立法會議員盧偉國上任專業及資深行政人員協會（專資會）會長無耐，櫈都未坐暖，下月中就帶隊考察山西，又計劃暑假與會友遠征西伯利亞，名副其實係驛馬星動。盧偉國尋日與傳媒聚會時分享嚟緊考察大計，佢話四月山西考察行程為五日四夜，身兼香港山西商會會長嘅胡曉明（Herman）第一個報名，常務副會長黃偉雄、副會長吳長勝、梁廣灝等都加入「鴨仔團」。
考察完山西之後，七月再遊西伯利亞，剛升呢做理事嘅新華旅遊董事總經理楊章桂芝將會帶隊。呢條路線好冷門，團友會先飛往蒙古，然後登上火車後駛往莫斯科，乘客透過車窗欣賞西伯利亞大草原風光及俄羅斯城鎮風情。原來佢哋已計劃乘坐豪華到極嘅「金鷹號」列車，難怪團費要成十多萬元，但會友話有機會開眼界，貴一貴都值得喎。
卓妮