中環出更：名人戴錶邊個話要貴？
當大家以為政商界名人戴錶一定會揀奢侈品牌時，其實有好多人反而鍾情實用性較高嘅中價錶或收藏古董錶。香港鐘表業總會日前在灣仔會展舉行董事會就職禮，英納格亞洲總代理高鼎國接任總會主席，獲得好多鐘錶界老行尊到賀。卓妮同在場嘉賓傾開，原來佢哋對手錶有獨特喜好同收藏心得，好似商務及經濟發展局局長蘇錦樑（Greg蘇）咁，唔使搭車都戴住隻八達通錶。
工業總會主席劉展灝（Stanley）係鐘錶界老行尊，但佢只係擁有約二十隻錶，通常揀款式要合眼緣，唔一定要貴價嘅。講到存放手錶，佢就多數存放喺夾萬，方便得閒攞出嚟抹油同欣賞喎。中南鐘錶創辦人莊靜庵次子莊學海就對古董錶情有獨鍾，佢話會將啲靚錶存放在瑞士，因為當地天氣比較乾燥，但如果擺喺香港，就要用一種木製嘅真空盒裝住喇。
Greg蘇戴八達通錶為買嘢
至於Greg蘇戴錶就講求實用性，卓妮見佢手上戴咗隻八達通錶，但佢又唔使乘搭公共交通工具，戴八達通錶做咩呢？佢話係方便買嘢喎，而且隻錶已經戴咗幾年了。另一官員教育局局長吳克儉就人如其名咁克儉，多年來只係戴過三隻錶，第一隻係佢中學之後爸爸所送贈，另一隻係同太太結婚周年時買嘅情侶錶，原本兩隻錶輪流替換，但後來爸爸送嗰隻錶壞咗整唔番，所以半年前就買多一對情侶錶佩戴。
講番鐘表業總會就職禮，新主席高鼎國對鐘錶業前景非常樂觀，話中價錶款嘅銷售增長速度會較快，高價位錶款升幅可能冇咁明顯。至於佢太太張尹馨（Grace）同兩個囝囝都有捧場，高太話唔擔心丈夫做主席後少咗時間陪家人，因為丈夫點都會預留周末陪佢哋喎。
卓妮