俗語話，一粒老鼠屎攪壞一鍋粥。咁如果有幾粒老鼠屎，結果又會點呢？唔使問阿貴，梗係污糟邋遢，臭不可聞喇。
呢嗱，前朝政府多名高官及富商先後捲入貪腐醜聞，令香港廉潔形象嚴重受損，廉潔指數一沉不起。政治及經濟風險顧問有限公司最新調查報告顯示，本港公務員貪污問題有惡化趨勢，港府打擊貪污決心備受質疑，廉潔評分喺亞洲只能排第四位，遠遠落後於排第一位嘅新加坡，真係丟架。
報告比較咗亞洲十六個國家及地區嘅貪污情況，以零分為最佳，十分為最差，香港得分係二點九五分，排於第四位，頭三位分別係新加坡、日本及澳洲。其中本港公務員嘅評分、檢控貪污嘅效率，以及政府打擊貪污嘅決心，評分均較舊年惡化。報告認為，本港貪污問題有惡化趨勢，主要係負責打擊貪污嘅廉署爆出連串貪腐醜聞，而前政務司司長許仕仁更因涉及貪污而被檢控，加上多單重大貪污案件一拖再拖，令人質疑當局打擊貪污嘅決心。
冇錯嘞，前朝政府一門幾貪，許仕仁及前廉政專員湯顯明固然臭名遠揚，而前特首曾蔭權爵士更成為過街老鼠。貪曾集團狼狽為奸，大搞官商勾結，利益輸送，廉潔指數有乜可能唔一跌再跌吖。呢，舊年全球反腐組織「透明國際」公布廉潔指數排名，香港又連跌兩級至第十四位，除咗創五年新低，仲被排名第五嘅新加坡愈拋愈遠添。而最奇怪嘅係，貪曾醜聞已被踢爆超過兩年，廉署調查到依家仲係無聲無息，如果話唔係官官相衞，細路仔都唔信喇。
講到貪腐醜聞，其實又點只咁多吖。本港富商劉鑾雄及羅傑承捲入澳門世紀巨貪案，日前被澳門法院裁定全部罪名成立，兩人分別判囚五年三個月，話就話伸張咗法律公義，可惜由於港澳之間並冇引渡條例，兩人依然可以逍遙法外，依然可以大搖大擺去富豪飯堂歎茶。更離譜嘅係，大劉以病為由拒絕出庭，導致案件一拖再拖，最後雖然勉強審結，但判咗等於冇判，簡直兒戲到極。
正所謂，國之將亡，必有妖孽，廉潔及法治係香港核心價值，近年被貪曾集團摧毀殆盡，講起真係可悲。喺邊度跌倒，就要喺邊度起番身，依家內地正全力反腐，連大老虎都敢打，香港又點可以例外呢？正如有人話齋，反腐只有一國，沒有兩制，香港想重建廉潔形象，挽回港人信心，只有將官商勾結集團徹底瓦解，貪官也好，奸商也好，一個都唔可以放過！