政府近年多項大型基建工程都「低開高收」嚴重超支，不時要向立法會追加撥款填氹，早已惹來各黨派議員不滿。建制派議員蔣麗芸（Ann）尋日就喺大會向發展局局長陳茂波（Paul）大興問罪，批評政府近年一口氣連推多個工程項目，搞到私人發展商都嫌「麵粉」太貴唔敢投資，促請政府「打散」工程，為工人提供持續就業機會。不過，阿Paul面對指控冇再賴太太，改為賴市民、賴法律、賴時間。
Paul起初例牌解釋，話整個建造業需求殷切，建築成本上升、工人開支又升。但商界廖長江（Martin）隨即踢爆政府工程超支前科纍纍，令市民覺得政府工程超支已經係慣例，要求政府諗計鎖定成本開支、加強效率，避免工程「一闊三大」。
阿Paul就死撐以往工程超支，部分係由於諮詢期期間要照顧市民意見而延誤，又話部分係因為要面對市民提出司法覆核嘅法律挑戰而受阻，而香港電台新大樓超支就因為「同當初預算有較大距離」喎，始終都要間接承認估錯數。
不過，奉勸阿Paul都係唔好再一味姓「賴」，認真研究改善方案好過啦！