政情：施法修章挽東華總理
下月起，城中六大慈善團體董事局將展開換屆接力賽，福建社團頭領施子清嘅兒子施榮恆（Ivan）將接任東華三院主席。不過，Ivan未上任就好頭痛，事關今屆董事局二十名成員之中有多達八人要離開，原因有自己唔做嘅，但更多係受到不得做多過四屆嘅董事局章程限制，令到一班善長焗住引退，而佢哋負責嘅慈善項目亦要換人接手，搞到倒瀉籮蟹。
大家都知一間公司董事局嘅穩定性係幾咁重要，但唔知點解東華三院會寫出咁嘅章程綁手綁腳？原來係一名前高官搵佢哋笨。Ivan話，十幾年前一位民政高官主動游說東華三院修改章程，將董事局人數上限設為廿人，總理任期就最多連任三屆，即係最多做四年，如果冇得升呢做副主席就要離任。
當年呢位高官話，咁做可以增加董事局嘅流動性，等有心有力嘅善長有機會加入東華三院大家庭，唔使被同一班人長期霸住個位喎！
中途焗退未能完「善」
理由聽落好似好合理，但實情係好心做壞事，皆因董事局總理多數會分管一啲慈善項目，原本跟得好好哋哋，但中途就要被迫引退，將工作交新總理接手，確係好勞氣。
咁仲未夠，由於總理升上副主席就唔受四年任期限制，有啲人為咗爭上位而奇招百出，令總理之間關係好微妙，而成功升呢做到副主席後，就可以排隊輪住做主席。仲有呀！九七年及○八年兩次金融危機時，好多人身家蒸發，當時董事局唔少善長兼顧不暇，紛紛求去，加上四年任期限制，令總理流失嚴重，危機重重。
爭取延長任期至6年
Ivan喺東華三院咁多年，對呢啲亂象好心水清，所以決定上任後第一件事就係爭取修改章程，將總理任期延長至五年，如果可以爭取到六年就最好喇！不過話時話，點解十幾年來東華歷任主席都冇人覺得有問題而提出修改章程呢？去年另一善團仁愛堂就修改章程，將董事局成員大幅擴大至四十名，淨係副主席就有一打咁多，唔通東華修改章程係難過其他善團嘅？