中環出更：「勤」揸電動車試性能
立法會議員陳克勤、新界社團聯會理事長陳勇及沙田區議員招文亮尋日聯同三間車廠代表召開記者會，宣布進行一個為期四個月嘅計劃，三間車廠會分別借出三部電動車畀佢哋，以測試電動車性能，然後再向環境局局長黃錦星提交計劃書，要求當局推行有利電動車發展嘅政策。
試駕四個月 撞花要賠錢
三人會喺四個月內，每日記低駕駛電動車嘅數據及實際操作問題作分析之用。克勤話，佢喺三星期前已經開始駕駛電動車，覺得部車嘅馬力同速度同一般私家車不相伯仲，只係要喺每晚臨瞓前事先計劃好第二日嘅行程，同埋要搵定各區充電站嘅位置，費事部車行行吓冇電「跪低」。
雖然陳勇仲未開始駕駛電動車，但佢尋日已經大讚部車安全可靠，又話唔少地方都可以免費充電，變相慳番唔少入油錢喎。不過，交通意外實在好難講，如果部車唔小心撞花咗點算呢？克勤就透露，佢哋已同三間公司簽訂協議，如果撞壞或撞花部車，就要賠償損失，甚至要賠番四十五萬元車價。睇嚟佢哋為咗推動電動車發展，去得盡過政府喎！
卓妮