中環出更：名人憶述九霄驚魂
馬航客機離奇失蹤，令各界議論紛紛，更觸發名人大談空中奇遇。保良局副主席陳細潔（Abbie）曾經喺頭等機艙遇上懷疑非禮事件；其家姐兼雪肌蘭國際集團主席劉陳小寶（Angel）就曾經「騎住」十號風球返港；而前東區區議會主席丁毓珠亦曾遇過巨大氣流。中華總商會榮譽會長霍震寰（Ian）慨嘆人生無常，惟有一上機就各安天命。
保良局日前喺灣仔君悅酒店舉行周年慈善餐舞會，講起空中奇遇，Abbie話每次坐長途機，例必換上睡衣，食粒安眠藥再戴眼罩，便倒頭大睡。
陳細潔「除鞋疑雲」
點知有次一覺醒來，發現冚喺身上嘅毛氈疑被人郁動過，擺法奇特，腳上毛毛鞋亦不翼而飛，佢心知不妙，馬上向空姐查問，由於無法證實有否陌生人曾走近佢座位，事件最後不了了之。
至於Angel都遇過九霄驚魂，佢憶述十多年前由澳洲返港，咁蹺香港掛緊十號風球，沿途機身搖晃不停，點知佢班機降落唔夠四分鐘，就有另一班機出意外，機身着火，佢睇見救護車趕去停機坪救人，驚險到極。講到最常出現嘅氣流，丁毓珠十多年前飛美國探子女時，都遇過巨大氣流，餐具彈上機艙頂，惟有綁實安全帶，祈求快啲抵達。
霍震寰：各安天命
經常搭飛機出外公幹嘅Ian出席另一場合時亦透露，佢曾經喺美國911恐襲事件後應邀到亞美尼亞出席一項武術活動，只好硬着頭皮上機，期間巧遇一位日本高官，對方直言若因為飛機意外而仙遊，除咗賠償金豐厚外，都係一種解脫，所以唔怕死喎。Ian慨嘆人生無常，乜事都可以發生，惟有一上機就各安天命。
卓妮