俗語話，聰明反被聰明誤，港府就係活生生嘅例子嘞。呢嗱，當局機關算盡，一意孤行想推行自願醫療保險計劃，推卸公共醫療責任，點知呢個縮骨大計出師未捷，阻力重重，搞到進退維谷，你話係咪唔衰攞嚟衰吖。
食物及衞生局局長高永文連日來繼續硬銷自願醫保，話最快年中諮詢公眾喎，又透露最初擬定嘅五百億元撥款之中，當中五十億元會用作設立高風險池，其餘四百五十億元就用作平衡公私營醫療服務基金，包括向私家醫院貸款作發展用途喎。至於自願醫保備受詬病，佢就繼續死撐，話計劃有助提升私營保險質素，希望吸引中產購買，多用私家醫院服務，紓緩公立醫院壓力，對基層亦有好處咁話。
高永文將自願醫保吹到天花龍鳳，可惜吖，佢講幾多廢話都冇用，一句真心話就出賣咗佢，佢話喎，擔心無人擁抱自願醫保，最終會難產收場。
嗱，呢啲就叫不打自招喇，自願醫保擺明搵笨，打劫市民，唔難產至奇吖。其實，港產官僚自己都識講啦，自願醫保先天不足，後天失調，根本唔會得到市民擁抱，就算再搞幾多花款，再搞幾多諮詢，都係嘥時間嘅啫，與其繼續硬銷，自取其辱，不如及早回頭，自動收檔，咁咪皆大歡喜囉，係咪？
再講吖，就算港府想推行自願醫保，都要先改革醫管局，提升公共醫療質素至講啦。市民家陣最大嘅難題，唔係冇醫保，而係冇一個令人安心嘅公共醫療系統。大家睇吓，公立醫院亂象叢生，醫護人手短缺，醫療設施殘舊，搞到醫療事故不絕，喺咁嘅情況下搞自願醫保，簡直係本末倒置，有乜可能唔撞板吖。
講到尾，公立醫院之所以事故不絕，醫療改革之所以卻步不前，就係因為港府一心掛住卸責，根本無心解決問題。咁多年來，當局不斷玩新花招，一時強制醫保，一時自願醫保，一時風險池，一時平衡公私營醫療服務基金，其實萬變不離其宗，就係打劫市民，推卸責任。
咪話功夫茶唔提醒吖，自願醫保係前朝政府留低嘅蘇州屎，現屆政府根本無必要拾人牙慧。係人都知，前食衞局局長周一嶽縮骨卸膊，庸碌無能，至會搞出一個以民為笨嘅醫保騙局，靠害市民，今屆政府何必助紂為虐，自製危機呢？
總而言之，醫療亂象病未除，醫保難產何足奇。自願醫保根本就係前朝庸官留下嘅怪胎，醫番都嘥藥費，索性及早落咗佢，以絕後患呀！