近期唔少人喺網上追捧比特幣（Bitcoin）呢種虛擬貨幣，但價格波動很大，少啲經驗都蝕錢收場。財爺曾俊華（鬍鬚曾）尋日出席青年論壇時，就有同學問佢會唔會管制比特幣，佢強調比特幣唔係真實貨幣，仲用網上遊戲使用嘅虛擬兵器做比喻，話兩者冇乜分別，既然政府唔規管「刀劍」，點解要規管比特幣呢？不過，鬍鬚曾就冇交代佢係咪機迷，否則可以同學生交流吓打機心得喇！
鬍鬚曾再解釋，政府擔心好多人用比特幣洗黑錢，交易雙方身份唔確定，貨幣後面又冇嘢支持，最多只可以當比特幣係網上交換貨物。政府對此都相當關心，皆因除咗鬍鬚曾出聲，尋日又發聲明，重申比特幣具高投機性及潛在風險，唔受《證券及期貨條例》保障，消費者可能會蒙受顯著金錢損失。
除咗比特幣外，有同學就話香港競爭力被新加坡趕上，鬍鬚曾透露，早前見過法國財政部長，對方話今年多咗一倍法國人移居香港，由兩萬人上升到近五萬人，原來因為法國薪俸稅高過香港四分之一。最後佢仲講到明冇興趣參選特首，寧願退休做老闆，又形容自己人工「適當」喎。