中環出更：鍾國斌想撈埋外傭中介？
紡織及製衣界立法會議員鍾國斌（Felix）早前以一元呎租，喺緬甸仰光發展當地首個港商工業園區，改以「Made in Myanmar（緬甸製造）」嘜頭繼續搵錢，據聞生意不跌反升添。唔只咁，Felix亦正游說緬甸當局，每年向香港批出二萬個緬甸女傭名額，紓緩外傭長期求過於供嘅情況。佢仲批評，外傭政策並冇與時並進，限制東南亞國家傭工來港工作嘅機會，唔通Felix想撈埋外傭中介嗰瓣？
促放寬管制 滿足需求
Felix解釋，其實東南亞地區有唔少國家，好似柬埔寨、越南等地都係輸入外傭嘅好地方，但奈何香港現行嘅家庭傭工政策規定，基於入境管制及保安考慮，柬埔寨、老撾及越南等地國民都唔可以來港做傭工。
佢認為，呢啲國家過去因為戰亂，政府擔心有大批難民湧到香港先有咁嘅管制，但時移勢易，唔少國家已經停止內戰，政府好應該檢討政策，放寬更多國家傭工來港工作喎。如果成事，Felix又會唔會率先請番個「柬傭」、「越傭」幫手呢？
卓妮