中環出更：港商場乏味 虞茱迪心痛
香港嘅商場被批評千篇一律、毫無特色，令個人遊旅客及本地人都感到乏味。時尚界名人虞茱迪（Judy）旗下一間概念專門店尋日開幕，Judy與獲邀出席嘅先施百貨行政總裁馬景煊（Philip）都話有同感，Judy仲好肉緊咁形容情況十分嚴重，慨嘆香港嘅趣味小店已經消失晒，值得地產商及業主們深思。
Judy曾任香港明天更好基金理事多年，經常到世界各地宣揚香港政經環境嘅前景，見到香港商場變成千篇一律感到好心痛。
通街金舖藥房
佢話，好多商場一味為迎接內地旅客而揀選租客，通街都係珠寶錶行及中西藥房，咁香港人去邊度買嘢呢？點解香港冇晒自己嘅Life Style？佢認為香港應該喺內地客及本地客之間取得平衡，唔可以一味以金錢掛帥。
同樣做咗明天更好基金理事多年嘅Philip，對呢個問題都好敏感，佢話一早已睇到問題存在，所以佢哋店內超過一半貨品都係自己採購，有時公司買手喺歐洲停留成個月，就係想確保貨品唔好千篇一律。
講番開幕酒會現場，「九巴金公主」伍穎梅（Winnie）及男友中建企業董事許晉平都有去趁熱鬧，一向寡言嘅許晉平尋日心情靚靚，卓妮同佢講起工作都幾好傾。唔講唔知，原來今時今日中建大廈名醫雲集，當年許晉平都有份度橋。
香港玩具協會榮譽主席陳明耀都有到場，佢間公司去年出產一隻電動玩具狗，識得感應主人嘅手勢及指令，做坐低、打觔斗等動作，結果喺歐洲大賣近一百萬隻，今年佢將食住條水推出電動玩具貓，希望闖出新商機。
卓妮