政情：公民講場︰「成」諾剪布信唔過？

立法會主席曾鈺成尋日喺立法會新春午宴上作出莊嚴承諾，話日後遇到議員「拉布」時會「逢布必剪，逢剪必快」，但經過買家印花稅一役後，當局因以口頭承諾代替立法而捱批，於是佢覺得有時口頭承諾仲衰過冇承諾喎，唔通佢想暗示自己嘅「剪布」承諾都係信唔過嘅？不過，之後佢喺議事規則委員會討論「剪布」前又話，依家嘅議事規則冇寫清楚「剪布」嘅規定，但佢又唔想求其搵個理由「剪布」，所以就建議由議員決定係咪喺「拉布」期間提出「中止辯論」或限制總發言時間，以抗衡無了期嘅「拉布」，即係將「剪布」交由議員決定囉！