前九龍東立法會議員李華明（肥仔明）以往農曆新年都會落區寫揮春、扮財神，但佢嘅繼任人胡志偉就比較木訥，學唔到肥仔明善於氹人嘅性格，唔識得寫揮春、扮財神，反而好唔好彩，手疾就盡得肥仔明真傳。
肥仔明以前成日落區派傳單，又成日同街坊揮手，揮揮吓就揮出個「網球手」來，點知胡志偉右手原來亦患上腕管綜合症，即係俗稱嘅「滑鼠手」。佢話，十幾年前睇過醫生，相信係因為佢寫字嘅時候姿勢唔好，加上近年用電腦時間愈來愈多，咁就變成長期病患喇。
雖然好似患上咗「不治之症」，但胡志偉都會用熱水加鹽浸吓手，可以紓緩病情。佢又話，有時打籃球射籃嗰吓，隻手都會隱隱作痛。