政情：「馬拉松」論政 頭頭是道
商務及經濟發展局前局長馬時亨（肥亨）自從因病辭官後，未有歸故里，反而活躍於政商界，發揮長袖善舞本色。肥亨尋日又出席電台節目，好似做咗時事評論員咁，點評來屆特首選舉、財爺錯估盈餘、擴闊稅基、港鐵事故，連強積金都講埋，但肥亨都答得四平八穩。
政府早前委任肥亨做港鐵董事，有傳係為佢接任主席鋪路。雖然佢尋日冇回應傳聞，但係就似足港鐵發言人，為港鐵近日接連發生事故補鑊，話港鐵一日接載幾百萬名乘客，運作非常之好，屬港人引以為傲嘅品牌，強調事故唔關系統性或老化問題，相信管理層會努力做得更好。不過，肥亨講講吓就話自己講多咗，應該交番畀港鐵講好啲喎！
「未雨綢繆」 重提銷售稅
肥亨做過財經事務及庫務局局長，當年建議開徵銷售稅，但阻力太大，最終都係要擱置。肥亨話，未來五至七年香港財政都係好穩健，儲備充足，就算增加經常開支都可以應付，但再遲多幾年就令人擔心喇。佢重提薪俸稅同利得稅佔香港稅收一半，對比競爭對手新加坡只佔三成幾，因為人哋有銷售稅同博彩稅，所以香港一有經濟波動，稅收就會大跌，所以要未雨綢繆喎。
之後肥亨又維護財爺曾俊華估錯數，話每個部門需要錢推動政策，不過推行期間會遇到好多問題，未必成功，同時稅收好難估計，計出來亦會有誤差，估錯係好閒嘅事，反而市民應該集中注意力，睇吓嚟緊嘅預算案對民生有咩影響。至於財爺成日被人話保守，肥亨就話經歷過沙士年代，任何一位財爺都應該謹慎理財，而財爺係咪「穩陣」就見仁見智喇。
最後主持仲問可唔可以由金融管理局提供強積金投資選項，肥亨都有回應，認為各人投資方向唔同，可能有人唔鍾意喎。睇到呢度，大家係咪覺得講漏咗樣嘢呢？無錯，就係下屆特首選舉，佢尋日就繼續硬銷前財爺梁錦松係下屆特首適當人選。正因為咁，最近有人就幫肥亨改咗個花名叫「馬拉松」，點解？唔使畫公仔畫出腸喇啩！