中環出更：一Game現形 高官議員 不識民間疾苦
立法會尋日舉行新春午宴宴請一眾官員及行政會議成員，秘書處趁新正頭玩遊戲搞吓氣氛，考考高官、議員對民生問題、公眾設施收費有幾了解。不過，原來班高官同議員連一包鹽、一罐豆豉鯪魚幾錢都唔知。佢哋成日口口聲聲話要幫基層大眾，連同民生息息相關嘅嘢都唔清楚，好難信佢哋會了解民間疾苦囉！
玩遊戲嘅高官隊成員有環境局局長黃錦星、勞工及福利局局長張建宗及新上任嘅政府新聞處處長聶德權，同佢哋對陣嘅議員就有王國興、譚耀宗同葛珮帆。遊戲問題都係一啲日用品價錢、交通票價及公共設施收費等。好似官員隊被問到四百五十克幼鹽幾多錢，而原本答案係一元五角至二元，佢哋就估咗三、四元，你估真係有市民「盲搶鹽」咩！
不過，議員隊都唔係醒好多，答咗豆豉鯪魚一罐要成三十元，而真正答案係十三至二十元。唔單止咁，佢哋對公眾設施收費都唔多清楚，其中一題要兩隊估公眾泳池成人月票收費，兩隊冇人答啱，議員比正確答案嘅三百元估貴咗二十三元，點知高官隊竟然答九十元，搞到主席曾鈺成都忍唔住寸班官員︰「呢個收費係咪口頭承諾嚟o架？」
講到樓價，班官員竟然估算將軍澳一個居屋貨尾單位要四百五十萬元，其實係三百二十萬元，估貴咗四成，難怪市民對政府打擊炒樓冇信心嘅！
卓妮