中環出更：李鋈麟靠東華搵番時辰八字
東華三院「馮鳳華紀念文化古迹廊」尋日舉行命名典禮，該古蹟廊位於東華三院文物館嘅一樓，由東華前總理馮丹藜捐款二百八十萬元支持保育，以其母親馮鳳華命名。副主席施榮恆及李鋈麟等都有捧場，李鋈麟仲自爆媽媽多年來都唔肯透露佢係咩時辰出世嘅，原來係怕江湖術士落降頭加害於佢，好在東華三院妥善保全咗佢嘅出世資料，最後先至搵得番自己嘅出世時間咋。
該文物館前身為一九一一年落成嘅廣華醫院大堂，左邊偏廳係以前嘅議事廳同帳房，而右邊則為舊診症室，目前已被列入為法定古蹟。一樓嘅文化古蹟廊擺放咗東華三院由一八七○年成立以來嘅重要牌匾，包括九大善堂之一嘅廣州愛育堂一八七一年時送贈嘅「惠周海外」牌匾、及清朝總督李鴻章聯同三位官員於一八八四年送贈嘅「見義勇為」牌匾等。
古蹟廊公開珍貴檔案
另外，部分館藏文獻亦係首次公開，包括各種醫療檔案、會議記錄及書信等。該院嘅檔案及歷史文化委員會正逐步將所有珍貴資料數碼化，方便公眾日後查閱。
講起館內保存妥當嘅記錄，李鋈麟自爆同東華三院好有淵源，事關佢喺廣華醫院出世，細個有咩頭暈身都會去廣華醫院睇病。佢又話，媽媽一直唔肯透露佢嘅出生時辰八字，直到後來佢喺廣華醫院翻查記錄先知道自己幾點出世，仲連邊個醫生接生都知道埋添！
卓妮