政情：鬍鬚曾明年走人？
踏入馬年，我哋繼續按慣例，邀請香港術數家協會術數師楊子東推算香港運程。開年第一件大事，相信都係月底揭盅嘅新一份財政預算案，咁財政司司長曾俊華（鬍鬚曾）今年會唔會繼續做「守財奴」？楊師傅冇正面提及，但就根據鬍鬚曾八字中嘅年、月、日三柱，批算即將發表任內第七份預算案嘅鬍鬚曾「心力交瘁、已萌退意」，正二月不但要注意心、血、眼健康，更有可能明年「跳船」添！財爺年年估錯數，又死守庫房拒絕規劃長遠扶貧措施，早就應該順應民意退下火線，過佢飲咖啡、睇法國電影嘅「中產生活」啦！
政局立秋後有望好轉
楊師傅形容，馬年香港乃「一片火海比劫爭財之局面」，政局方面，香港上半年皆處困境，「有政府等於冇政府」、雞鳴狗盜之事頻生，立秋後先有望好轉。今年政府工作「重中之重」係政改諮詢，政改方案有望喺今年第四季出爐，咁究竟係吉定凶？
楊師傅就此批算身兼政改諮詢專責小組組長嘅政務司司長林鄭月娥馬年之吉凶。楊師傅話，林鄭馬年運程一般，其中正二月最頭痕，七、八月可得到好處，九月運情再度反覆，十一月更大事不吉。
至於政制及內地事務局局長譚志源上半年亦諸事不順，七、八月就行事有利，而副局長劉江華亦將喺立秋後仆直。照咁睇，政改方案似乎唔應該等到第四季先出爐喎！政府係咪應該把握農曆七、八月契機，推出政改方案以免誤咗吉時呢？
蘇錦樑陳茂波冇運行
是非多多嘅商務及經濟發展局局長蘇錦樑及發展局局長陳茂波亦冇運行，楊師傅形容蘇錦樑「傷官生財沖月柱」，似旺非旺亦冇大建樹，狠批「有冇呢個人都得」。至於陳茂波今年立秋後官位將再次受動搖，但會否落台仍係未知之數。玄學呢樣嘢，信不信由你。