政情：王惠芬靜修 十日唔講嘢
為少數族裔爭取權益十幾年嘅融樂會前總幹事王惠芬（Fermi）去年年底離任，佢自嘲依家係冇書讀、冇工開嘅「雙失」人士。趁住難得咁得閒，Fermi報咗為期十日嘅靜修營，參加者要十日唔講嘢，真係名副其實嘅「靜修」。Fermi話係第一次參加，好期待，真係未出發、先興奮喇。
自嘲雙失 遲啲先打算
Fermi卸任咗總幹事後，大家都關心佢嘅動向，Fermi就話想休息一、兩年再作打算。不過依家佢每星期都會返融樂會一、兩日，一方面做交接工作，另一方面就幫手搵下屆總幹事人選。加上融樂會計劃喺今年內出書，講下少數族裔學習中文嘅難處，所以Fermi都會幫手催促有份寫書嘅學者交稿。
政府上月發表嘅施政報告中，有唔少幫助少數族裔嘅措施。Fermi就話，好歡迎政府為少數族裔學生設立「中國語文課程第二語言學習架構」，臨卸任終於畀佢爭取到，認真開心。