蘭桂坊作為一個烏煙瘴氣嘅人間妖域，實在係名不虛傳，簡直要幾妖有幾妖。最近之嘛，警方搗破一個活躍於老蘭嘅賣淫王國，拘捕女淫媒以及九名索到爆嘅高級妓女，當時女淫媒向三名假扮遊客嘅洋警官兜搭，提議大玩三王九后嘅「12P性愛派對」。原來喎，被捕嘅女淫媒之所以能夠喺蘭桂坊極速壯大，僅僅一年就撈到風生水起，背後隱藏一段傳奇身世。
未講淫業新天后嘅傳奇身世之前，當然要先講講東方報業集團嘅傳奇事迹。其實喺舊年八月，本報記者已經明查暗訪披露過人間妖域嘅賣淫情況，咁先至引起警方高度關注，然後部署三個月搜集情報，調查並且監視目標人物，發現女淫媒喺老蘭兜搭外籍同內地豪客，聲稱可以安排不同國籍嘅佳麗提供性服務，每次收費五千元起，仲向妓女同嫖客提供毒品。亦即係話，傳奇東方，又記一功！
好嘞，女淫媒有乜嘢傳奇身世呢？原來呢一個雌性扯皮條樣貌甜美又保養得宜，雖然芳齡已經四十有一，不過自稱二十七歲都有人信。女淫媒最勁嘅係有姿色之餘仲有知識，擁有大學學位，精通多國語言。內地出生嘅佢跟隨家人移民新加坡，大學畢業之後來港發展，邂逅一名港大教授，十多年前結婚。
良家婦女因乜事幹會變成風塵女子嘅呢？原因係後來婚姻破裂，有人做咗濫交蒲精，男又啱，女都啱，蒲下蒲下就蒲出一顆事業心，索性將興趣化作性趣，物色高質素囡囡加盟佢嘅淫業王國。都話萬般皆下品，惟有讀書高啦，女淫媒就係因為讀書夠多而練成超強嘅語言能力，有本事以外語游說好索嘅鬼妹仔甘心下海搵快錢，令到艷幟旗下活色生香。聽講喎，呢個賣淫王國月賺一百二十萬元，證明知識確係能夠改變命運。
之不過咁，依靠妓女維生始終係一種違法嘅犯罪行為，再加上牽涉毒品，梗係法網難逃啦，傳奇女淫媒睇怕都要認真諗諗如何度過獄中嘅皮肉生涯。
功夫茶講咗咁耐，其實最主要係想點出一個重點，蘭桂坊真係愈來愈似爛鬼坊，三山五嶽乜人都有，好人好姐都有機會喺人間妖域墮落成為妖魔鬼怪，誤人誤己誤蒼生。
所以話啫，如果唔想老蘭繼續以罪惡淵藪嘅姿態示人，任由呢個華洋雜處嘅九反之地搞到香港蒙羞，警方真係要嚴厲執法，絕對不能姑息破壞法紀嘅犯罪分子，理得佢讀過書定係盲字都唔識一個。
爛鬼坊家陣妖氣沖天，又淫又亂又毒，警方唔可以因循苟且執法不嚴呀，快啲去斬妖除魔啦！