政情：陳曦齡教養生 最緊要早瞓
西醫陳曦齡（Helen）創辦嘅維特健靈品牌已經成立咗二十年，佢尋日出席公司慶祝活動時，除咗教大家分辨靈芝種類之外，仲即席分享其養生之道同良好嘅生活習慣。Helen話，自己種嘅靈芝，底部顏色會白啲，較為腍身，而野生靈芝底部就呈黑色，摸起手實淨啲，但如果太大嘅話，內裏木質較多，未必適合食用，原來揀靈芝都有咁多學問。
保持心境年輕 勤運動
至於養生之道，Helen話健康心態好重要，所以佢每日都會同自己講只得三十五歲，打扮亦要好似三十五歲咁。另外，生活習慣對健康影響亦好關鍵，除咗唔食甜品同煎炸食品外，每朝起身都會堅持做十五分鐘運動，但最重要都係每晚要十一點前瞓覺，如果睡眠唔充足就乜都假喎，難怪佢身型一直咁fit喇。
至於近日有傳佢公司將會上市，身為董事長嘅Helen就話上市只係長遠目標，依家公司唔係等錢使，會視乎有冇上市嘅實質需要，亦未有決定會唔會喺今年上市，但就預計會再喺香港開多十間分店。佢又話，公司可能會向內地發展，目前喺廣州已經有兩間分店，未來有機會進駐南京等地區，但形容進入內地市場就好似摸住石頭過河。