政制及內地事務局尋日就本年度施政報告向立法會政制事務委員會作出匯報，班議員主要關心政改問題，但李卓人（阿人）就竟然問取消強積金對沖機制嘅問題，而劉慧卿（卿姐）就批評施政報告對行政立法關係隻字不提，之後就話政府多年來唔肯下放權力畀地區民政專員，令當區難以培訓政治人才。呢啲問題都唔係政制局嘅工作範疇，真係問到離行離列，搞到局長譚志源（Raymond）都唔識點答。
至於工業界林大輝嘅發言就正路啲，大讚「政改三人組」有台型夠官威，但政改一役成亦「三人組」，敗亦「三人組」，事關政府唔肯表明「公民提名」係咪違反《基本法》，令人感覺佢哋係「假開明」喎。
Raymond重申，政府現階段唔會就任何方案表達意見，又寸爆大輝唔好讚政府咁多，因為大輝嘅說話「又有沙糖又有咩」。對於阿人同卿姐嘅問題，Raymond就尷尬話行政立法範疇由政務司司長負責，而地區行政事務則屬於民政事務局施政範疇，隨口答咗幾句就算喇。