政情：今日你上鏡：蔡伯勵批港馬年「好平穩」

本港富豪御用堪輿曆學家蔡伯勵，尋日出席一個健康食品嘅周年活動時心情大靚，皆因佢見到唔少好朋友，包括「家全七福」太子爺徐德耀、醫院管理局前主席胡定旭（肥胡）等。蔡大師嘅擇日通勝相信好多人都睇過，馬年將至，肥胡見到身為蔡真步堂第三代傳人嘅蔡大師，當然唔執輸問吓來年嘅香港運程啦。不過蔡大師只係拋低一句「好好、好平穩」就輕輕帶過，未知當中仲有咩玄機，如果想知多啲，睇嚟要擇日再問佢喇。