政情：星星再闖關 落難屯門
三個堆填區擴建工程一波三折，當局去年向立法會申請撥款擴建全軍覆沒，早前又被踢爆懷疑偷步開展工程，最近就連深圳市人大代表亦聲稱收集一千四百萬個簽名表態反對。為免今年去立法會闖關再度觸礁，環境局局長黃錦星（星星）尋日就親自落屯門區議會試水溫兼拉票，點知如意算盤打唔響之餘，更反被一眾示威者同區議員圍剿，有區議員仲寸佢連鄉下佬都不如，可謂出師不利。
推廢管藍圖炒冷飯捱轟
會議原定十點半鐘開始，但因為星星喺屯門公路遇上交通意外，到場時又有五十幾個屯門居民「恭迎」，搞到佢遲咗十分鐘開會，部分區議員已經等到臉燶燶。加上佢劈頭就以炒冷飯式推銷廢物管理十年藍圖，區議員自然無名火起，繼而連珠炮發攻擊，質疑星星落區似推銷員多過似局長。亦有人話堆填區唔係單純涉及環境問題，單憑星星一人之力難以解決問題。
自稱係「鄉下佬」嘅區議員古漢強都忍唔住踩多腳，鬧爆當局等到臨開會一刻，先肯交幾頁紙嘅文件畀區議會，批評當局敷衍了事：「呢啲文件，我都製作到出嚟啦！」星星就解釋，整份廢物管理十年藍圖太長，所以炮製咗份精簡版畀大家。之後佢又承諾下次會提早呈交開會文件，但選擇以電郵方式傳畀大家，以減少印刷版廢紙。有人聽到就忍唔住笑，話星星踩自己啲文件淪為廢紙。
發叔籲先做好地區諮詢
星星被人踩到上心口，臨走前都攞番個尾彩，以客人身份叫區議會下次開會唔好再用紙杯飲水，避免製造不必要廢物喎。屯門區議會主席劉皇發（發叔）語重心長忠告星星，當局未充分諮詢地區意見之前，唔好貿然去立法會闖關，否則地區同政府之間矛盾會惡化。
不過，當局堅持下月將擴建堆填區建議提交立法會環境事務委員會討論，今年中再將方案提交財務委員會審批，又話會盡快喺新界西、東及北，分別成立地區聯絡小組，邀請地區及專業人士加入，加強同地區溝通咁話。