中環出更：肥亨寸卿姐為「普」選鋪路
立法會議員劉慧卿尋日主持網台節目時無啦啦係咁講普通話，搞到出席節目嘅前高官馬時亨（肥亨）忍唔住話，連前港區全國人大代表吳康民都喺報章撰文推薦卿姐參選特首，卿姐真係好犀利，依家轉埋講普通話，令人愈來愈覺得佢係特首候選人咁話。卿姐就反駁肥亨，話自己喺立法會都有講普通話，只係肥亨少見多怪。
講到特首選舉，肥亨話如果有普選嘅話，特首候選人就應該話畀市民知有咩班底，佢都明白未選就要人企出嚟係好困難，但至少都應該有政務司司長、財政司司長同律政司司長人選，咁市民先會對未來嘅管治有信心。對於最近發表嘅施政報告，肥亨都話支持當中嘅扶貧政策，但政府恒常開支就會增加，萬一新加坡減利得稅，依靠利得稅收入嘅香港嘅競爭力就會大減，所以真係要考慮下擴闊稅基咁話。
卓妮